Лютеиндеуші гормон (ЛГ, LH) – гипофиз гормоны, әйелдерде етеккір циклі мен жыныс гормондарының түзілуін реттейді, ерлерде тестостерон синтезін ынталандырады. Бұл – гликопротеидтік гонадотропты гормон, гипофиздің алдыңғы бөлігінде гипоталамустың гонадотропин-рилизинг-гормонының (люлиберин) және жыныстық стероидтардың (теріс кері байланыс механизмі) әсерінен түзіледі. Жыныстық жетілуге дейін қандағы ЛГ деңгейі төмен болады. Жыныстық жетілу кезеңінде гонадотропиндердің циклдік секрециясы басталып, жыныс бездерінің дамуын және жыныс гормондарының бөлінуін ынталандырады. ЛГ секрециясы тәулік бойы импульстік сипатта жүреді.

Тестостерон – негізгі еркектік жыныс гормоны, бірақ ол екі жыныстың ағзасында да кездеседі. Ерлерде оның түзілуі негізінен аталық бездерде, аздаған бөлігі бүйрек үсті бездерінде жүреді. Тестостерон ерлерде екіншілік жыныстық белгілердің дамуына әсер етеді, жыныстық функцияны (либидо мен потенция) белсендіреді, сперматозоидтардың түзілуін ынталандырады.

Әйелдерде тестостерон аналық бездердегі фолликулдың дамуына қатысады. Бұл гормон қаңқа мен бұлшықет массасының дамуына ықпал етеді, сүйек кемігінің, май бездерінің қызметін реттейді, көңіл-күйді жақсартады.

Фолликулды стимулдаушы гормон (ФСГ) – әйелдерде фолликулдың өсуі мен жетілуін, ерлерде сперматозоидтардың жетілуін ынталандыратын гормон.

Фолликулды стимулдаушы гормон мен лютеиндеуші гормонды бір мезгілде анықтау ерлер мен әйелдердегі бедеулікті диагностикалау және емдеу тактикасын белгілеу үшін қолданылады.

Эстрадиол – әйел жыныстық гормондарына (эстрогендерге) жатады, оның деңгейі мен түзілуіне байланысты әйелдің репродуктивтік және жалпы денсаулығы анықталады. ФСГ еркектік гормондарды әйелдік гормондарға айналдырады. Эстрадиол әйелдерде негізінен аналық бездерде түзіледі. Жүктілік кезінде оны плацента да бөледі. Ерлерде эстрадиол аталық бездерде түзіледі. Екі жыныста да бүйрек үсті бездерінің қыртысы аз мөлшерде эстрадиол бөледі. Қалыпты деңгейдегі эстрадиол овуляцияның дұрыс жүруін, жұмыртқа жасушасының ұрықтануын, жүктіліктің дамуын қамтамасыз етеді, сондай-ақ сүйек тінінің саулығын және қандағы холестериннің қалыпты деңгейін сақтайды.