Тиреотропты гормон (ТТГ, тиреотропин, тиротропин; ағылш. thyrotropine, TSH, thyroid stimulating hormone) – гипофиздің алдыңғы бөлігінен бөлінетін тропты гормон. Химиялық құрылысы бойынша тиротропин гликопротеидті гормон болып табылады. Тиреотропиннің рецепторлары қалқанша бездің эпителий жасушаларының бетінде орналасқан. ТТГ осы рецепторларға әсер ете отырып, тироксиннің түзілуі мен белсенуін ынталандырады. Ол аденилатциклаза ферментін белсендіреді және без жасушаларының йодты сіңіруін арттырады.

цАМФ деңгейінің кейінгі жоғарылауы ТТГ-ның трийодтиронин (Т3) мен тироксиннің (Т4) биосинтезіне әсерін қамтамасыз етеді. Бұл гормондар – өсу мен дамудың негізгі гормондары. Сонымен қатар тиреотропин бірнеше күннен кейін ғана көрінетін ұзақ мерзімді әсерлер туындатады: ақуыздардың, нуклеин қышқылдарының, фосфолипидтердің синтезінің артуы, қалқанша без жасушаларының саны мен көлемінің ұлғаюы.

Қандағы бос Т4 пен ТТГ концентрациялары арасында кері байланыс бар. Сондай-ақ тиротропин перифериялық ТТГ рецепторларына әсер етіп, селенге тәуелді моно-деиодиназа белсенділігін арттырады және тіндердің қалқанша без гормондарына рецепторлық сезімталдығын күшейтеді. Осылайша ол тіндерді тиреоидты гормондардың әсеріне «дайындайды».