Жүктілік әртүрлі өтуі мүмкін. Әдетте ол 40 аптаға созылады. Бірақ бұл шартты түрде қабылданған көрсеткіш, себебі қалыпты жағдайда босану 37–42 апта аралығында кез келген уақытта басталуы мүмкін. Сондықтан жүктіліктің бүкіл кезеңінде оның өту барысын, ықтимал асқынулардың қаупін және пайда болу мүмкіндігін, ұрықтың өсуі мен дамуын, ең бастысы болашақ ананың жағдайын мұқият бақылап отыру қажет.

Жүкті әйелдің жағдайындағы ықтимал ауытқуларды анықтауда зертханалық зерттеу әдістері елеулі рөл атқарады.

Гестация (яғни жүктіліктің ұзақтығы) үш триместрге бөлінеді. Екінші триместр – жүктіліктің 13-аптасынан 28-аптасына дейінгі аралық. Бұл – жүктіліктің ең тыныш әрі қолайлы кезеңі, себебі осы уақытта асқынулар салыстырмалы түрде сирек кездеседі.

Алайда бұл кезеңде мұқият және сапалы медициналық тексерулерден бас тартуға болмайды. Бұл уақытта жатыр белсенді түрде ұлғаяды, сондықтан әйелдер жиі белгілі бір қолайсыздықты сезінеді – ағзалары әлі өзгерістерге толық бейімделіп үлгермеген. Қан айналымының көлемі артқандықтан артериялық қысым төмендеуі мүмкін және анемия қаупі жоғарылайды.

Осы себепті екінші триместрде жоспарлы тексерулер кемінде әр үш апта сайын жүргізілуі ұсынылады. Жүктіліктің 18–21 аптасында міндетті түрде ұрықтың скринингтік УДЗ-сы жасалады, онда оның өлшемдері бағаланып, жүктілік мерзімімен сәйкестігі анықталады, плацентаның орналасуы тексеріледі. Сондай-ақ ұрықтың жынысын дәл анықтауға болады.

Қауіптердің бірі – жатыр мойнының әлсіздігі. Сондықтан истмико-цервикалдық жеткіліксіздікті (қауіпті асқынуды) анықтау үшін жатыр мойнының ұзындығын өлшеу – цервикометрия жасалады.

20-аптадан бастап қанның аралық талдауларын тапсыру қажет, бұл ықтимал ауытқуларды дер кезінде анықтап, емдеуді бастауға мүмкіндік береді. Әрбір тексеру алдында зәрдің жалпы талдауын тапсыру міндетті, себебі бүйрек тарапынан асқынулар қаупі бар.

24–28 апта аралығында глюкозаға төзімділік сынағын тапсыру өте маңызды. Бұл гестациялық қант диабетін анықтау үшін қажет, ол тек ана үшін ғана емес, сондай-ақ нәресте үшін де қауіпті.

Көрсетілімдер:

• жүктіліктің екінші триместрі;
• жүктілік кезінде асқынуларды диагностикалау үшін;
• екінші триместрде профилактикалық тексеруден өту үшін.

Маңызды! Бұл бөлімдегі ақпаратты өзін-өзі диагностикалау және өзін-өзі емдеу үшін пайдалануға болмайды. Диагноз қою және дұрыс ем тағайындау үшін міндетті түрде дәрігерге жүгіну қажет.

Денсаулығыңызға қамқор болыңыз, сонда сіздің сәбиіңізбен көптен күткен кездесуді ештеңе көлеңкелемейді!